Ўзбекистон Республикаси Марказий банкининг 2 апрель куни берган маълумотларига кўра, 5 граммли олтин қуйма нархи илк бор 6,7 миллион сўмдан ошди ва рекорд даражани қайд этди. Бунда 1 грамм олтин 1 млн 42 минг сўмга баҳоланмоқда. Бу мамлакат тарихида рекорд натижа бўлиб, сўнгги бир йил ичида олтиннинг кескин қимматлашганини кўриш мумкин. Бундан роппа-роса бир йил олдин - 2024 йилнинг апрель ойида 5 граммли олтин қуйма нархи 4 миллион 720 минг сўм атрофида эди. Бир йил ичида бу қиймат 1 миллион 980 минг сўмдан ортиқ кўтарилиб, тахминан 41 % ўсишни кўрсатди.

Айни пайтда олтиннинг глобал нархи 1 троя унсияси учун $3116,1 ни ташкил қилмоқда. Бу кўрсаткич ҳам бутун жаҳон тарихида рекорд даражада турибди.

Глобал миқиёсда олтин нархининг ўсишига таъсир қилувчи омиллар:

1. Геосиёсий беқарорлик: Глобал инқироз ва можаролар (Россия–Украина уруши, Яқин Шарқдаги кескинлик) сабабли инвесторлар хавфсиз актив сифатида олтинни танламоқда.

2. АҚШ Федерал захира тизими (FED) сиёсати: АҚШ фоиз ставкаларининг ўзгариши олтин нархига бевосита таъсир кўрсатади. Фоиз ставкалари юқори бўлса, инвесторлар облигацияларга қизиқиш билдиради, паст бўлса олтинга талаб ошади. Шунингдек, олтин АҚШ президенти Доналд Трaмпнинг савдо сиёсати ва жаҳон савдосидаги кескинликнинг кучайиши фонида энг даромадли активга айланди.

3. Марказий банкларнинг захираларни ошириши: Сўнгги йилларда Россия, Хитой ва бошқа давлатлар ўз олтин захираларини кенгайтиришга ҳаракат қилмоқда. Бу эса нархларни янада оширишга туртки бўлади.

Аввалроқ, Марказий банк 100 граммлик олтин қуймаларини сотувга чиқаргани ҳақида маълумот берган эдик.