Moody's агентлигининг баҳолашига кўра, Оctobank 2024 йил якунида юқори молиявий кўрсаткичларга эришган: соф фойда 144 миллиард сўмни ташкил этди, активлар рентабеллиги — 4,8%, активларнинг қарийб 80 % эса ликвид маблағлардан иборат. Банкнинг капитал даражаси юқори: биринчи даражали капиталнинг етарлилик коэффициенти — 38%, умумий капиталнинг етарлилик коэффициенти — 48,3 %, бу тартибга солиш талабларидан деярли икки баравар юқори ва юзага келиши мумкин бўлган иқтисодий муаммоларга бардошлиликни таъминлайди. Moody's "Оctobank" АЖга узоқ муддатли B3 даражали халқаро кредит рейтингини берди. Рейтинг бўйича прогноз — барқарор.

Moody's келгуси 12-18 ой ичида банкнинг молиявий ҳолати барқарор қолишини тахмин қилмоқда. Янги маҳсулотларни ишга тушириш, мижозлар базасини кенгайтириш ва жорий кўрсаткичларни сақлаб қолиш эвазига Оctobank рейтинги ошиши мумкин, дея хабар беради агентлик.

"Бу Оctobank учун биринчи халқаро рейтинг — ва кўриб турибмизки, банкимизнинг ривожланиш йўналиши тўғри танланган. Moody's рейтинги бизга халқаро ҳамкорлар билан янада барқарор муносабатлар ўрнатишга ёрдам беради ва глобал бозордаги нуфузимизни оширади. Янги маҳсулот ва хизматларни йўлга қўйиш бўйича кенг кўламли режаларимиз бор ва бу келгуси йилларда банкимиз равнақининг асосий омили бўлади", — деб таъкидлади Оctobank Бошқаруви раиси Искандар Турсунов.

Оctobank — Ўзбекистон бозорида 20 йилдан ортиқ фаолият юритаётган универсал хусусий банк. Банк рақамли инфратузилмани ривожлантирмоқда, 3 миллиондан ортиқ жисмоний шахсларга ва 2500 дан ортиқ корпоратив мижозларга хизмат кўрсатмоқда.

Маълумот учун, Moody's — дунёдаги етакчи халқаро рейтинг агентликларидан бири. Агентлик молиявий кўрсаткичлар, бизнес модели, хавфларни бошқариш ва иқтисодий таҳдидларга чидамлиликни таҳлил қилади.

Ҳамкорлик асосида