Жорий йил 21 феврал куни "Миллий банклараро процессинг маркази" АЖ (HUMO тўлов тизими) акциядорларининг навбатдан ташқари умумий йиғилиши ўтказилади. Бу ҳақда компаниянинг тегишли эълони Корпоратив ахборот Ягона порталига жойлаштирилди. Йиғилиш кун тартибидаги масалалар орасида компания бошқарув раиси билан тузилган меҳнат шартномасини муддатидан илгари бекор қилиш ва жамиятнинг янги бошқарув раисини сайлаш ҳам бор.

Бундан келиб чиқадики, HUMO тўлов тизими ташкил топган вақт (2019 йил)дан буён унга раҳбарлик қилиб келган Шухратбек Курбанов лавозимини тарк этиши мумкин.

^{Шухратбек Курбанов / Фото: Spot.uz}

Шунингдек, акциядорларнинг умумий йиғилишида жамиятининг Кузатув кенгаши аъзолари ҳам сайланиши кутилмоқда.

Аввалроқ, "Миллий банклараро процессинг маркази" акциядорлик жамияти (HUMO тўлов тизими)ни 65 млн АҚШ доллар таклиф қилган "Paynet" АЖ сотиб олгани ҳақида хабар берилганди.

Эслатиб ўтамиз, HUMO тўлов тизими 2024 йилнинг тўққиз ойида 120 млрд сўм, 2023 йилда эса 114,5 млрд сўм соф фойда олган.